A viaxe de mil setecentos mozos galegos na procura dun futuro mellor. Unha epopea baseada en feitos reais, que nos descobre un período escuro e triste da nosa historia.

Galiza, mediados do século XIX. O país está asolado pola fame e a enfermidade. A única saída para os mozos como Orestes Veiga pasa por buscar un futuro mellor en Cuba. Inxenuos pero cargados de ilusión, acabarán traballando nos campos de azucre de Urbano Feijóo de Sotomayor. Pero este empresario non espera traballadores, senón escravos. E é que o seu obxectivo é substituír os escravos africanos por compatriotas novos. Será entón cando descubran que «con sangue se fai o azucre».
«Azucre» é unha novela breve que Bibiana Candia converte nunha epopea impoñente coa forza e concisión da súa prosa. Unha viaxe hipnótica, baseada en feitos reais, que recupera un período escuro da nosa historia, marcado por un colonialismo desapiadado como o reflectido por Joseph Conrad no seu «O corazón do negror».